CNA/CDFs le SAC/ZRA karlak i Tonzaang peng chung i kahnak ah hin ZRA lei in minung 5 in 10 karlak an thi cang, tiah anmah Zomi lei hna nih an langhter.
Nihin Tonzaang khuahriang i kahnak zong ah ZRA lei in tlangval no Tuang Lek ti mi pa a thi tthan.
May 12 thawk i an i kah hrawnghrang hrimhrim khan ZRA lei in a thi mi an um lengmang i ZRA dirkamhtu hna nih an hmanthlak he online ngaihchiatnak an tar lengmang.
Tihni May 19 hrim ah khan cun nikhat ah ZRA pathum bak an thi ti a si i, an hmanthlak zong hmun khat te ah an tar hna.
Tonzaang ah a ummi SAC ralhrang pahnih le ZRA tapung pakhat zong hi CNA le CDFs nih an nung in an tlaih ko hna.
