SAC ralhrang nih Chin miphun le Kachin miphun pawl ramdang kal khawh lo ding in passport pek phih an timh, tiah Khit Thit Media nih a ṭial.
Chin le Kachin miphun pawl passport pek an khamnak kong cu passport a sokmi pumpak pawl nih Khit Thit Media ah an chim hi a si.
October thla thawk ah Passport sok ah a kalmi Kachin pa pakhat nih, “Keimah lawng pek lomi ka si lo. Ka hmai ah a sokmi Kachin miphun dang sok an pe hna lo. Kachin miphun nan si ruang ah kan phih chung an ti. Hnu ah rak ra te an ka ti,” tiah a chim.
Kayin ramkulh, Myawaddy khua ah ramdang passport a sokmi minung pakhat zong hi a nu cu Kawl a si, a pa cu Kawl a si nain Passport an pe duh lo.
Cu pa nih cun, “Kei hi Kawl le Chin cawhmi miphun ka si. Myawaddy ah passport ka tuah i passport zung bawi nih Chin na si caah kan in pe lo a ka ti. Mah tluk saupi ka hngah hnu ah Chin miphun si ruang ah an ka pek lomi cu ka ingpuang tuk,” tiah a chim.
SAC kuttang ah a ummi Ministry of Home Affairs zung rianṭuantu hna zong nih atulio hi SAC nih ramleng a kalmi hna passport pit tein an check lio a si i, ramkhel ah a cawlcangmi hna le CDM a tuahmi hna ramdang an chuah lo nakhnga fek ngaiin kham an timh, tiah Khit Thit Media ah an chim.
