Yangon ramthen, Dawpung peng ah nu pakhat cu atu pa ralkap tla ding mincazin ah aa tel ruang ah tiva hlei cung in a zuang i aa that, tiah theih a si.
Dawpung peng, Anawmar sang ah a um mi kum 55 hrawng nu pakhat cu nizan March 20 zinglei sml. 8:00 hrawng ah khan hlei cung in a zuang i aa that.
A thatmi nu nih hin kum 20 hrawng a si mi tupa a ngei. Hi a tupa hi ngaktah a si caah a ngakchiat te in amah nih a zohkhenhmi a si.
“A tupate hi mi daite a si. Ngaktah a si i, mah nu nih hin a ngakchiatte in a cawmmi a si. Atu ah cun a tupa te nih a pi hi a cawm ve cang. Ralkap tlak ding in vote an zuhter hna lio ah khan hawidang cu a zaammi an um len nain anih cu a zaam lo. Atu zong inn ah a um ko,” tiah sangchungmi pakhat nih a chim.
March 10 thawk khan Anawmar sang chung ah SAC ralhrang pawl he an hnuzul minung 10 hrawng nih meithal i put in ralkap tla ding vote an zuhter hna i atu aa that mi nu i a tupate zong hi ralkap tla ding in mee a poh ve, tiah an chim.
Sangchungmi pakaht nih cun, “Hawidang cu an zaam nain chungkhar cawmkengtu pawl cu zaam awk a tha lo. Mee a poh vemi pakhat pate lebang cu a pa a um ti lo, a nu zong lephiat zawtnak in ihkhun ah a rilmi a si. Atu aa that mi nu i a tupate zong hi chungkhar cawmkengtu a si ve,” tiah a chim.
