Mizoram, Saiha lei nih an control mi Maraland Defense Force (MDF) damiah bu nih Lovai lei ah a kalmi khuami motor cu meithal in an kah hnu ah an chuh hna, tiah theih a si.
Sual erlet Saiha lei hriamtlai MDF nih March 14 ah khan Satu khua le Lovai karlak ah Pu Ngolawkhai Paw motor cu meithal in an kah i an chuh hna hi a si.
Pu Ngolawkhai Paw hi Lailenpi khuami a si i, Satu khua le Lovai khua karlak ah an motor meithal in kahpiak an ton caah motor cu an zaamtak.
Cu motor cu damiah bang in a cawlcangmi Saiha lei hriamtlai MDF pawl nih an fir i, CNA motor kan laak, tiah online ah lih bak in an tar hoi.
Cu lawng si lo in SAC ralhrang chan ah Lailenpi Sipin nih an rak hman mi motor zong Chali khua le Lovai khua karlak ah damiah MDF nih meithal in an kah hoi i an chuh hna. Motor mongtu pahnih le spare pahnih an i cit i khawndennak um lo te in an zaam kho.
Saiha lei tapung/damiah MDF nih an firpiakmi hna motor pahnih hi MDF nih cun Mara Evangelical Church (MEC) ta le CNF ta a si, tiah online ah bia an vahpi len nain cucu a dik lo mi a si, tiah khuami tampi nih an chim.
