Laipa Joshua Van nih caan tawite chung ah Zhalgas Zhumagulov, Kevin Borjas le Felipe Bunes a hun tei hna tik ah atulio UFC Flyweight ṭhuat zuamnak ah minthang pakhat a si timi cu el awk ṭha lo a si ko cang.
Ahlan aa ṭhuatmi Zhumagulov le Kevin Borjas ah khan cun Judgete biachahnak in teinak a rak hmuh caah mi lung a rak si deuh vak lo.
Sihmanhsehlaw, Felipe Bunes he an vun i thongh tik ah cun Joshua Van nih Felipe Bunes cu Round 2nak ah TKO in a tei.
Round 3nak tiang i ṭhaut hau ti loin TKO in Joshua Van nih Felipe Bunes cu a hun tei tik ah Joshua Van Level hi zei tluk rengreng dah a si timi kha vawleicung mizapi nih an hun hmuh.
Joshua Van a min a hun langhsar deuhdeuh bang in UFC ah a sung bal ve rih lomi Muhammad Mokaev nih Joshua Van he i ṭhuat a duh tiah an chim.
Muhammad Mokaev hi Muslim a si i, England ram ah khua a sami Arab ralzaam a si. Kum 23 lawng a si ve rih.
November 2021 ah khan UFC ah a lut i voi 5 aa ṭhua cang. Voi khat hmanh a sung bal rih lo. Atu kum March 2 ah an tuah dingmi “UFC Fight Night 238” ah hin Muhammad Mokaev hi aa ṭhua lai.
Asinain, aho he dah an i ton lai timi an khiak rih lo. Joshua Van hi UFC nih i ṭhuat ding in puai an pek a si ahcun amah he zong an i tong taktak kho.
