Rakhine hriamtlai AA nih Chinram, Paletwa peng chung ah Gate nganpi an on i tangka an khawlh thluahmah cang, tiah theih a si.
Khuami pakhat nih, “Rakhine le Chin ramri Paletwa ramchung Shinletwa ah AA nih gate an on mi a si. Mi lutchuak pohpoh tangka an laak cang hna,” tiah a chim.
Paletwa khuapi telh in khuate tampi cu AA le SAC ralhrang an i kah ruang ah khan ralzam an si hna i atu bantuk in AA nih tangka a laak tik ah an har sa ngaingai hna.
“Ral a zam mi lawngte kan si caah tangka zong kan ngei lo. Hi lio caan ah Gate on i tangka laak cu kan caah a har tuk,” tiah khuami pakhat nih a chim.
Paletwa ah eidin thilri an luhpi tawnnak Kyauktaw-Paletwa lam cu a pihnak a sau pah cang caah Mizoram lei tu in eidin tirawl laak a si i, kan unau Paletwa peng chung mi hna hi an harsa ngaingai hna.
