Myanmar ram Democracy cawlcanghnak rian bawmh nakding ah US House of Representative nih PDF le tlangcungmi hriamtlai pawl Technology (နည်းပညာ) le ralhriam a si lomi (non-lethal assistance) lei bawmhnak pek ding in biachahnak a ngei, tiah theih a si.
National Defense Authorization Acts (NDAA) timi upadi he aa ruang in US nih kumtin Budget a suai tawn i, atukum ah Myanmar ramchung hriamtlai hna Democracy cawlcanghnak caah bawmhnak pek ding in a hun telh chih hi a si.
Asinain, hi Myanmar ram bawmhnak hi ralhriam cawknak tibantuk si loin PDF le tlangcungmi hriamtlai hna rianṭuannak ah Technology lei ningcang phun 7 in bawmhnak pek a timh bia a si.
Cu bawmhnak ah cun SAC ralhrang a dotu Myanmar ramchung hriamtlai hna pehtlaihnak (communication) le ralkap bu i kurit ning le i hruai ningcang (command and order) kong pawl ah bawmhnak peng ding a si.
Cun, Myanmar ram democracy cawlcanghnak ah ramleng bawmhnak a um chinchin nakhnga le SAC ralhrang buarmi sualtuahnak pawl a hlathlai i a phozartu zatlangbu hna sin ah bawmhnak pek ding in timhtuah a si ve.
SAC ralhrang duhlo ruang ah CDM a tuahmi ralkap/palik pawl caah bawmhnak program pawl zong an telh chih.
Tu kum US lawmakers pawl nih an hnatlakmi NDAA hi azapi ah cahmai 4,408 a sau. Myanmar ram bawmhnak kong ah ” Tlangcung miphun hriamtlai hna” timi le “PDF” timi min hi cahmai no. 2,307 ah mingfangkheh tein an langhtermi hmuh khawh a si.
Hi Myanmar ram bawmhnak hi 2023 in aa thawk lai i, 2027 tiang kum 8 chung a si lai. April 2022 zong ah khan US cozah nih Burma Acts timi a rak chuah i, cu chung ah cun Myanmar ram sin ah (SAC ralhrang telh lo) kum 8 chung $220.5 million bawmhnak pek ding in hnatlak a rak si.
Atutan NDAA ah ramleng lei bawmhank he pehtlai in Ukraine caah ralhriam lei $800 million bawmhnak pek chap ding in an hna a tla.
Cun, Tuluk tlerhkhawnnak a tongmi Taiwan hi kum 10 chung ah US nih $10 billion bawmhnak pek ding in biachahnak an ngei fawn.
Credit: The Chin Journal
