Atutan Qatar ah an tuahmi World Cup ah Argentina hmaikal le captain a simi Messi cu kum upa lei a si cang nain World Cup bawlung chuihtu vialte lak ah uar bikmi thotho a hun si.
Nihin Netherland le Argentina puai ah Messi hrimhrim zoh ding in ramdang hmunkip in Qatar ah a rak rami hi minung a thongthong in an si, tiah Airline tuanvo ngeitu hna nih an chim.
Nihin Netherland he puai ah Messi nih Assist a tuahmi thawng in minute 35 ah Molina nih goal khatnak a sut.
Cun, minute 73 ah Argentina nih penalty an hmu. Messi nih a sut, a kawl. Netherland nih minute 83 ah goal khat an cham hna. Additional Time minute 10 a dih lai te bak ah Netherland nih goal khat an thuat than. An i tluk.
Extra Time minute 30 an chuih ah an i kawl kho lo. Penalty ah Argentina nih (4) 2-2 (3) in Netherland cu an tei hna.
Group Stage ah Saudi Arabia nih Argentina cu zoh dawh lo ngaiin an tei hna nain ahnu puai pawl ah an hun tha chin thluahmah than.
Messi caah atutan hi an ram aiawh in a donghnak bik bawlung a chuih a si kho cang. Cucaah, Messi chan ah World Cup hrai voi khat tal thlir hrimhrim ding in Messi fan pawl le an rammi zong nih an duhpiak.
Atu tiang Argentina nih teinak an hmuh khawhmi hi mi tampi nih Messi credit an pek ngaingai. Credit pek phu zong cu a si ve ko.
Angaite tiah Messi hi Khrihfa tha tuk a rak si. Khrihfa chungkhar in a thangmi a si bang in a minthang tuk zong ah Pathian a philh lo nakhnga a orhlei liang ah “Hling lukhimh chinhmi Jesuh” tattoo aa suai.
Semifinals ah Argentina cu Croatia he an i tong te lai.
