Hlasak thiam Benjamin Sum nih phungning loin aa tuahmi Mizoram (Farkawn) Birth Certificate le Aadhar Card cu Mizoram nawlngeitu hna sin ah a ap tthan hna, tiah theih a si.
Ben Ben nih a deu aa tuahmi catlap pawl in Motorcycle cawk ding ah license tuah a timhmi cu Mizoram online ah phozarpiak a rak si i Mizo mi tampi lungtling lo ngaiin an um hna.
Cucaah, Ben Ben nih phungning lo a catlap pawl cu a khirh tthan hna i a tanglei bantuk in nawlnak a tuah:
“Passport ka herh tuk caah le zeitluk in dah poipang a chuah lai timi kan rak theih lo caah ka rak tuah sualmi a si. Atu bantuk in thil ka tuahmi hi keimah pumpak zong nih a poi tuk tiah ka ruah i, nan ka ngaihthiam naklai zaangfah kan nawl hna. Keimah thil theih lo ruang ah ka tuah sualmi a si. Midang thinlung ka fahternak cung ah ngaithiam kan hal hna. Keimah ruang ah bia elnak tampi a chuahmi zong hi intuar zia a har tuk ka ti. Ka unau Mizoram mipi din ah ngaithiam kan hal hna. Mizo le Chin unau ka sinak ah harsatnak chuahpitu si ka duh hrimhrim lo,” tiah Ben Ben nih Mizoram ttuanvo ngeitu hna sin ah nawlnak bia a chim.
Atu tiang ah cun Ben Ben hi acozah lei nih tazacuai tibantuk a tong hraw lo. Phungning loin Card a tuahpiaktu pawl belte hi an hlathlai cuahmah hna lio an si.
