Kum 15 chung hrawng Messi le Ronaldo karlak ah ahodah a thiam deuh, ahodah vawlei tuanbia ah bawlungchiuh thiam bik a si (the Greatest of All Time-G.O.A.T) timi bia elnak cu nizaan World Cup Final ah a hun dong cang.
Nizaan World Cup Final ah Argentina nih France cu Penalty 4-2 (3-3) in an tei hna caah 2022 World Cup hrai an thlir.
Argentina nih World Cup hrai an thlir bang in atutan World Cup ah Messi nih ahohmanh nih an tlamtlinh khawh lomi thil tam nawn a tlamtlinh.
Messi cu vawleicung bawlungchuih zuamnak champion hrai vialte a thlir khotu a si cang.
Messi cu World Cup ah Golden Ball Award voi 2 tiang in a hmutu a pakhatnak bik minung a si cang.
Messi cu World Cup Knock Out Stages puai kip ah goal a sut kho pengtu bawlungchuih thiam a si cang.
Messi cu Argentina rammi bawlungchuih minthang vialte lak ah an ram caah goal tam bik a suttu a hun si cang.
Cu lawng si loin atutan World Cup ah Messi nih Man of the Match laksawng pehzul in voi 5 a hmu. Cucu vawleicung tuanbia ah a voi khatnak bik a si fawn.
2022 July le August karlak ah tuah an timhmi Ballon d’Or laksawng zong hi Messi nih a co lai tiah zumh ngaingai a si. Messi nih Ballon d’Or laksawng a hmuh chap cun a voi 8nk a si lai.
A cunglei Messi tlamtlinhmi vailte hi Portugal hmaikal Christiana Ronaldo nih a tlamtlinh kho rih hna lo. Abikin Ronaldo nih Portugal cu World Cup hrai voi khat hmanh a thlirpi kho hna lo.
Nizan World Cup dih in vawleicung bawlungchuih zatlang a ngaithlaitu expert pawl nih vawleicung tuanbia ah bawlungchuih thiam bik micazin an langhter. (1) Messi (2) Pele (3) Maradona (4) C. Ronaldo tiin an chiah.
Aluancia kum 15 hrawng in Messi he an zuamcawhter ngaingaimi Ronaldo cu number 4nk ah chiah a si cang i, Messi he cuaithlai ti kho ding in number (2) zong ah a phan ti lo.
Messi nih bawlung he pehtlai in zeizongte a tlamtlinh dih cang. Cucaah, Messi cu G.O.A.T a si ti hi el awk tha lo a si cang.
