Senthang peng, Buanlung khua ah nihin March 10 zaanlei sml. 3:00 hrawng ah puahkehnak a chuak i, ngakchia pakhat a nunnak a liam i, ngakchia minung 4 nih hliam an tuar tiah kan theih.
Hi kong he pehtlai in khuami pakhat nih, “Nihin 2024 Vaute 10 zaanlei suimilaam 3 (Myanmar caan) hrawng ah khuachung i motor a dirnak ah puahkehnak a chuah caah motor pawngkam i aa nuammi ngakchia tete nunnak liam le hliamtuarmi an um. Nunnak liammi hi kum 7 lamkal Salai Biak Tin Peng a si i, a dang a hawile minung 4 nih hliam an tuar. Hliamtuarmi hna cu Salai Victor Lian Uk Thang kum 9 lamkal, Salai Bawi Hlei Cung kum 11 lamkal, Salai Samuel kum 8 lamkal, Salai Van Biak Cung kum 14 lamkal hna an si,” tiah a chim.
A cunglei khuami pakhat thiam nih cun, nihin cu ngaihchiatnak faak kan tong, Malaysia ah chungkhar pawcawmnak ruat in khuasa mi Salai Cung Ceu Lian kum 32 nih an kan liamtak, Lailei ah tu bantukin ngaihchiatnak kan tong, nihin puahkehnak hi zei in dah aa thawkmi a si le, zeiruang ahdah a puah ti kan hngal kho lo tiah, a chim chap.
Buanlung khua ah hin a liamcia 2022 October 19 sianginn chuah lio caan ah ralhraang bomb ruangah Salai Henry Bawi Za Lian kum 6 le Salai James Siang Za Uk kum 6 an nunnak a rak liam, Mai Nancy Ca Len Par kum 6 nih hliam a rak tuar.
