Taingai SAC ralhrang sakhaan an lak khawhmi kong he pehtlai in CDF/CDF-Siyin nih Chinland Council chungtel ralkap bu hna sin ah kan i lawm tuk, tiah lunglawmhnak ca an chuah.
“Siyin hmunram a simi Taingen khua lak ding in a kan bawmtu Chinland Council chungtel Chin miphun ralkap bu vialte cung ah kan i lawm. Taingen SAC ralhrang sakhaan cu CNA, CDF CDM-Siyin, CDF-Hakha, CDF-Thantlang, CDF-Hualngo, CDF-Zarniat, CDF-KKG, PDA le TCDF tiin January 12 zinglei sml. 7:30 ah kan lak khawh,” tiah an langhter.
Taingen SAC ralhrang sakhaan dohnak ah CDF Hakha in Tluang Tin Ceu, CDF-KKG (B7) in Langh Pum Khai, CDF-KKG (B1) in Te Boih le Val Pui, CDF-KKG (B6) in Si Thu Aung, CDF-Thantlang in pakhat, CNA in Van Thawng Lian le CDF CDM-SIYIN in Vungh Kim Sing an nunnak a liam i, atu bantuk in nunnak an pekmi hi Siyin tuanbia le Chinmi tuanbia ah a zungzal in kan upat hna lai i, kan philh hna lai lo, tiah an langhter chap.
Taingen SAC ralhrang sakhaan ah a thimi hi SAC ralhrang palik minung 12 le ralkap minung 18 an si, tiah CDF CDM-Siyin nih cun cathanh ah an langhter.
“Kahdohnak caan chung vialte ah raldoh a kan bawmtu kan miphun hawi ralkap bu hna, sii-ai thlopbulnak lei in a kan bultawltu hna le lungsau thinfual tein a kan theithiamtu mipi cung ah kan i lawm hringhran,” tiah CDF CDM-Siyin nih lunglawmhnak bia an chim.
