SAC ralhrang nih a tuah mi Myanmar ram taang 10 caminpuai phitnak ah Chin ramkulh chung ah tanghra a phi mi 400 leng an um i Hakha zong a phi mi tam bik lei ah aa tel ve.
Nizaan March 11 ah Myanmar ram huap in taang 10 caminpuai an thawk i, Chinram ah cun caminpuai a phi mi siangngakchia 401 lawng an um, tiah theih a si.
Taang 10 caminpuai phi ding in min a petu siangngakchia 1,723 an um nain a phi taktak mi cu 401 lawng hi an si.
SAC kut tang Chinram fimcawnnak zung ṭuanvo ngeitu pakhat nih, “A leng in phit ding in min a pe mi siangngakchia pawl hi a bau mi an tam. Cun, abiapi in Paletwa ah taanghra siangngakchia 995 an um i humhimnak ruang ah Sitwe ah phit ding in timtuah a si. Asinain, atulio thil sining ruang ah Sitwe ah an kal kho hna lo. Cucahcun caminpuai a phi mi an zor hi a si,” tiah Khonumtung ah a chim.
Hakha ah taang 10 caminpuai a phi mi siangngakchia 72 an um i, Falam ah 83, Tedim ah 119, Tonzaang ah 11, Cikha ah 80, Mindat ah 2 le Matupi ah 34 ti in an si.
Chinram chung khuapi a si mi Thantlang, Paletwa le Kanpetlet ah cun atu kum taang 10 caminpuai a phi mi siangngakchia an um lo, tiah theih a si.
Credit – The Hakha Post
