SAC ralhrang sakhaan lak kahdohnak ah ralṭha taktak in hmaisuang in ral a domi fa 5 ngei Kachin nutung cu KIA nih upat peknak an tuah i a rank zong an kaiter, tiah Kachin thawngzamhnak hna nih an ṭial.
Hi nu hi Daw Ja Maw Khawng tiah auhmi a si i, SAC ralhrang nih Myanmar uknak an lak hlan ah cun thilṭhit in a paw aa cawmmi a si. Ralhrang nih uknak an lak hnu in PDF ah a lut.
Kachin ramkulh, Hpakanh peng, Huaikha SAC ralhrang sakhaan lak kahdohnak ah Daw Ja Maw Khawng hi hmaisuang in pa pawl he ralṭha taktak in ral a domi a si.
Huaikha SAC ralhrang sakhaan cu January 6 thawk khan PDF le KIA nih an doh i, January 20 tlamtling tein an lak khawh.
Daw Ja Maw Khawng cu ralram ah a ral a ṭhat ning le mah zawn ruat lo a pum aa peknak cu a hawile ralkap nih an theihpi lawng si lo in KIA ralkap zung (Dai Lawn Rung) nih Sergeant rank an pek, tiah theih a si.
