January 13 ah aa Joshua Van he UFC ah aa thong dingmi Felipe Bunes hi MMA Fighter pawl nih hman lo ding timi khammi sii (Steroid) a rak hman ruang ah thla 6 chung an rak dinhtermi a si.
Hi hlan ah hin Felipe Bunes hi LFA ah a rak i thong. Khammi sii a rak hman ruang ah thla 6 an rak dinhter i, August 2023 ah khan MMA chumtual ah a rak chuak ṭhanmi a si.
Felipe Bunes caah cun atutan Joshua Van he an i thongh dingmi hi UFC ah a voi khatnak (Debute) aa thongh a si lai. Kum 34 a si cang caah Joshua Van hi a tei lo ahcun a hmailei caah ruahchannak a um lo ngaingai.
Joshua Van hi UFC ah Zhalgas Zhumagulov le Kevin Borjas a rak tei cang hna caah mipi zong nih aa tongh ningcang an uar ngaingai.
Joshua Van le Felipe Bunes an i thongh nakding kong he pehtlai in Youtube ah ruahnak a langhtertu hna zong nih Joshua Van nih a tei lai tiah an zumh deuh.
Youtuber pakhat nih cun, “Kum 34 a si cangmi Felipe nih hin Joshua Van a tei lai ding cu a har ngai lai. Felipe cu khammi sii zong a rak hmangmi a si. Mah le mah i zumh lo ruang ah hi bantuk khammi sii a hmangmi nih Joshua Van bantuk, ṭha tein aa thong i a thiam zong a thiam bakmi MMA Professional hi tei awk ah cun a har ngai lai. Sii a hman ti lai lo tik ah Felipe hi amah le amah aa zumhnak zong a zor phut lai ti cu a fiang,” tiah a ruahnak a langhter.
“Tapology” timi Website nih Joshua Van le Felipe Bunes an i thongh nakding kong he pehtlai in “Community Predictions” a tuah i, cu ah cun Joshua Van nih a tei lai a titu hi 96% an si i, Felipe Bunes nih a tei lai a titu cu 4% lawng an si.
MMA zuamnak Betting a tuahtu “Oddstrader” zong nih teitu dirhmun si ding ah Joshua Van hi zumh deuhmi (Favorite) ah an chiah.
Felipe Bunes hi Brazil rammi a si i, Brazil zaangleknak phun khat a simi Jiu Jitsu (Tlaihkhih phun) a thiam ngaimi a si. Felipe Bunes i a mi teinak bik zong hi tlaihkhih ningcang hi a si. Cucaah, Joshua Van hi aa ralrin ngaingai cu a hau.
Joshua Van le Felipe Bunes cu atu thla January 13 ah USA ram, Nevada ramkulh, Las Vegas khua ah an tuah dingmi UFC 84 ah Flyweight thongh zuamnak ah an i tong lai.
