Shan ram chakeli Laukkai i Brigadier Genenral minung 6 hna cu MNDAA sin hriam an chiah caah SAC nih thong an thlak hna caah an mah lei ttang ralkap cheukhat nih SAC dohthan an timh tiah ralkap chung thawngpetu nih Khit Thit Media ah a chim.
“Brigadier General minung 6 hna i an misa hna cu hriam tlai in an i pum hna. Dothlennak ralkap hna nih Lashio an kah sin in an mah zong nih SAC lila kah an timh ve hna. S tu hi SAC nih cu hna cu vanlawng in bomb a thlak len hna” tiah a chim.
A tu lio hi SAC nih a mah a doh than ding mi ralkap an um tiah a ruah nak hmun poah cu bomb a thlak cuahmah i nihin January 11 ah Lashio peng Maiyaw khua cu Jet Fighter in bomb a thlak.
“SAC dohkalh aa tim mi anmah chungtel ralkap lila umnak hna cu bomb a thlak cuahmah,nihin January 11 lawng ah Lashio peng Maiyaw khua ah bomb lung 37 a thlak,” tiah a chim.
MNDAA sin ah hriam a chia mi SAC ralbawi Brigaier General minung 6 tlaih an si hnu ah Laukkai hmunram i commander in chief rian a tlai tu Lt.col That Htaik Lin le a ralkap hna cu an zam hna tiah theih a si.
Laukkai ah hriam chiah a si hnu in Lt.col That Htaik Lin ah a ralkap hna cu Laukkaing in Tanhyan ah an kuat hna,cu hnu ah Brigadier minung 6 tlaih an si timi thawng an theih hnu ah Lt.col That Htaik Lin le a ralkap hna cu Tanhyan in an zam than hna hi a si.
“An pu le 6 thong an thlak hna caah an duh lo i Lt.col That Hhtaik Lin nih a ralkap hna cu a auh hna i an zam. Laukkai ah hriam a chia mi ralbawi vialte thong thlak an si caah an i lungsak lo.an pu le khawh in an mah zong thongthlak an si ve lai ti an theih ca zong ah a si i SAC ralbawi lei hna nih an mah le chungkhar ca miaknak lawng an kawl an ti caah a zam mi zong an tampi” tiah a chim.
SAC ralhraang hna nih hin Laukkai ah hriam a rak chia mi an ralbawi minung 6 hna cu rian tlam tlinh lonak, cung lei nawl alnak le dohkalhnak ruang ah tiin an tlaih hna hi a si.
Credit – CBN NEWS
