Facang cawk awk um lo in thla 3 chung a um cang mi Matupi khua ah facang phurtu motor a voi khatnak bik a phan, tiah thawng kan theih.
Facang tun 400 hrawng a phur mi motor cu January 25 ah khan Matupi khua ah a rak phan, tiah khuami pakhat nih a chim.
“Facang tun 400 hrawng a phur mi motor Matupi ah a rak phan. Facang a ngei lo mi chungkhar hna ca ah cun a za rih ko lai. Khuapi ning in cawk awk ah cun kan i za lai lo. A dang facang phurtu motor zong an rak phan rih lai an ti,” tiah khuami pakhat nih a chim.
Matupi ah a phan mi facang hi Pa-De-Thatiah an auh mi a si i, tun khat ah Kyat 120,000 in cawk a si.
Aluancia thla 3 hrawng in khan SAC ralkap nih Matupi ah motor luh le chuah an kham caah khuami hna eidin tirawl lei ah harsatnak an rak tong ngaingai.
Matupi khua i biaknak lei bu hna le khua nu khua pa hna nih SAC ralkap le Chin hriamtlai hna sin ah nawlnak an tuah hna hnu ah atu bantuk in facang phurtu motor a rak phak khawh hi a si, tiah thawng kan theih.
