AA he ral a domi Maraland Defense Force (MDF) nih CDF-Mara ralkap pahnih an tlaih chap hna, tiah CDF-Mara nih atu zaan ah thawngpang an chuah.
Nizan tihni January 20 ah khan CDF-Mara ralkap Salai San Hne le SAlai Ra Lai San cu meng-9 khua i Gate ah MDF nih an tlaih hna, tiah an langhter.
Hi hlan ah hin CDF-Mara ralkap 4 cu MDF nih an rak tlaih cang hna. CDF-Mara ralbawi Baih Hne Chua le ralkap Boi Ya cu January 5 ah khan Mizoram, Lungpu khuate in Thingtlang khua lei an kal lio ah MDF nih an rak tlaih hna.
Baih Hne Chua le Boi Ya va lak ding in a kalmi CDF-Mara ralbawi (Byuhahmu) Pu Htet San le ralbawi Pu Khu Ma zong an tlaih chap hna. Atu ah a dang CDF-Mara ralkap 2 an tlaih chap hna caah MDF nih CDF-Mara ralkap 6 an tlaih cang hna.
MDF nih an tlaihmi hna CDF-Mara ralkap pawl cu hri in an ttem hna i tlerhkhawn pah buin an kalpi hna, tiah CDF-Mara nih an chim.
Tlaihmi pawl thlah ding in CDF-Mara nih an nawl lengmang hna nain atu tiang ahohmanh an thlah rih hna lo.
