AA ral a domi Maraland Defense Force (MDF) nih Chinland Council chungtel CDF-Mara ralkap 4 an tlaih hna, tiah theih a si.
CDF-Mara ralkap a simi Baih Hne Chua, Boi Ya, Pu Htat San le Pu Khu Ma hi MDF nih an tlaihmi hna an si, tiah CDF-Mara nih thawngpang an chuah.
CDF-Mara ah ralbawi pakhat a simi Baih Hne Chua le ralkap Boi Ya hi January 5 ah khan Mizoram, Lungpu khuate in Thingtlang khua lei an kal lio ah MDF nih an tlaih hna.
Tlaih a tongmi Baih Hne Chua le Boi Ya thlahpiak tthan ding in CDF-Mara ralbawi (Byuhahmu) Pu Htet San le ralbawi Pu Khu Ma nih AA le MDF cu an nawl hna.
Meithal zei hmanh i ken lo in Shwe Leik Wah khua ah rak rat ding in MDF nih Pu Htet San le Pu Khu Ma cu an auh hna. Eindin le humhimnak ttuanvo kan lak, tiah MDF nih an ti hna hnu ah an vung kal hi a si.
Asinain, Shwe Leik Wah khua ah a phanmi Pu Htet San le Pu Khu Ma cu MDF nih an rak tlaih ve hna i, atu tiang an thlah hna lo, tiah CDF-Mara nih an langhter.
