India ram, West Bengal State ah a ummi Messi aa hruhpimi pa pakhat nih a inn cu Argentina angki bantuk in a thuh i onnak a tuah ti a si.
A inn Argentina angki bantuk in a thuttu pa hi Kolkata khuahriang ah a ummi Shib Shankar Patra tiah auhmi lakphak a zuar pa a si.
West Bengal mipi nih an uarmi Football Team hi Brazil le Argentina an si. Shib Shankar Patra inn cu a tu ah cun Argentina fan pawl pumhkhawmhnak hmun ah aa chuah cang.
Shib Shankar Patra cu media nih bia an hal tik ah a tanglei bantuk hin a leh hna.
“2018 World Cup ah khan Messi bawlungchuih zoh ding in tangka ka rak i khon. Rs. 60,000 tiang kaa khon khawh. Asinain, Travel Agent sin ah khualtlawnnak kong ka hal tik ah a tlawm bik Rs. 150,000 tal na ngeih a herh a ka ti,” tiah a chim.
Cucaah, tu kum zong a hmun ah ka kal khawh lo vevek ah ka inn tu hi Argentina angki bantuk in ka thuh lai tiah tangka kaa khonmi cu ka hman tiah a chim chap.
