Argentina nih France an tei hna i World Cup champion an si lio ah angki cunglei phoih buin le hnuk langhter buin a lawmmi nungak 2 cu Qatar cozah nih an tlaih hna lo caah an rammi biaknak lei upa pawl an lung tling lo ngaingai.
World Cup an tuahnak Qatar hi Muslim ram a si bantuk in nu nih sexy tuk in thil i hruk le taksa langhter in tlonlen hi an khammi a si.
Angki aa phoihmi Messi fan nungak pahnih hi Instagram ah cun Milubarbiie timi min le Noe timi min aa pemi an si.
Qatar nawlngeitu nih an tlaih hna lo pin ah atu ah cun an ram ah an phan diam cang. Noe nih cun Qatar in vanlawng cung ka kai bak khan an ka tlaih lai ti ka phang tuk. Vanlawng chuak zokzok seh tiah thla ka cam tiah a chim.
Milubarbiie zong hi Europe chung ram pakhatkhat ah ka phan cang tiah a Instagram ah a hmanthlak he a tar ve.
Qatar cozah nih kan tlaih hna lai an ti nain an tlaih hna lo caah Muslim biaknak lei upa pawl nih Twitter ah lungtlin lonak an langhter len.
