Atutan 2020 World Cup ah hin kumcaan saupi Messi le Ronaldo karlak cuaithlainak cu Messi lei cuailung nih a vun lerh duahmah cang.
Cucu el awk a tha bak lo. Ronaldo zong a thiam bak, upat awktlak bak a si ko nain Portugal Team a donghnak bik puai 2 an chuih lio ah Ayan ah an chiahmi nih khan a limhaang a zorter tuk lawmmam.
Ronaldo hi 2006 in an ram Portugal aiawh in World Cup ah a chuih cang nain Semifinals tiang lawng a phakpi khawh hna. 2006 ah Semifinal voi khat an rak phan.
Atutan World Cup zong ah Ronaldo nih Ghana he puai ha goal khat lawng a sut khawh fawn.
Khatlei khel ah Messi nih cun goal 5 bak a sut cang i, assist voi 3 tlamtling in a tuah khawh. Atu tiang World Cup tuanbia ah kum 35 cung minung nih goal 5 a sut khotu Messi lawnglawng hi a si rih.
Cu pin ah atutan World Cup ah hin Messi nih pehzul in voi 4 khengte Man of the Match laksawng a tinco. Cun, atu ah Argentina cu Final ah a kaipi khawh cang hna. Atutan hi Argentina tuanbia ah World Cup ah Final a voi 6nk an kai a si cang.
Atutan ah Messi nih Ronaldo cu a hun chilhnanh ngaingai nain Ronaldo uar a umnak cu upat awktlak ngaingai in bia a chim khawhmi a si.
Sunghzatlaknak le soiselnak tampi he Ronlado cu an ram lei ah a kir. Asinain, a Instagram ah zapi sin ah cakuat a tialmi a um.
“Kan ram Portugal caah World Cup champion si hi kan chunmang ngan bikmi a si. Bawlungchuih lei ah minthatnak tampi ka hmuh ko nain ka caah abiapi bikmi cu vawleicung bawlung zatlang ah kan ram hi cungcuang bik ah umter khawh hi a si. Cuti ka si khawhter nakhnga fak piin kaa zuam. Kum 16 chung kan ram caah bawlung ka chuih i, upat awktlak le talent a ngeimi kan rammi tampi he bawlung ka chuih ti.
“Kei zong nih ka sining vialte pek in kaa zuam. Ka chunmang a tlamtlin nakhnga harnak ka tonmi pawl hnu ka chi ballo, ka pah chih tawn. Sihmanhsehlaw, nizaan (Dec. 10) ah cu chungmang cu a ziam dih ee…
“Mi tampi nih keimah kong ah thil tampi an chim, an tial, an ruahnak an langhter. Asinain, kan ram Portugal caah ka lungput cu aa thleng hlei lai lo. Kan ram le ka chuih ti hawi pawl caah kaa tinhmi chunmang a tlin hlanlo kaa zuam peng rih ko lai.
“Hi pin chim awk ka ngei ti lo…Portugal na cung ah ka lawm. Qatar cung zong ah kaa lawm…” tiah Ronaldo nih a tial.
