Mi zeirello ngai in goal a lawmh tawntu Neymar te ram Brazil cu Croatia nih ruah lo taktak in Penalty in an tei hna.
Minute 90 ah an i tei khawh lo caah Extra Time minute 30 an pek hna. Extra Time ah goal khat veve an i sut hoi.
Penalty an i sut i Croatia nih (4) 1-1 (2) in an tei diam ko hna. Bawlung lei comment a petu ramdang mi tampi nih cun mi zei ah an rello tuk, sungh phu an si, tiah an chim.
Manchester United ah caan saupi bawlung a rak chuihmi Roy Keane nih cun, “Ka uar lo ngaingai. Micheu nih Brazil nunphung a si an ti. South Korea he an chuih ah khan Brazil nih goal 4 an sut hna. A voi khatnak an goal i an lam kha cu a si awk a si ko. Asinain, an goal tinte mahti rumro lam kha cu mi zeirello a si i, zoh zong a dawh lo. Ka zoh hna ah kei cu kaa nuam lo,” tiah Sky News ah a chim.
Brazil cu World Cup tuanbia ah voi 5 tiang pakhatnak a rak hmutu an si i, atu tiang ah anmah tluk in World Cup hrai tam a thlir khotu an um rih lo.
Asinain, mi zerello in porhhlawt tuk in an um caah atutan cu puantom zual in inn ah an tlung ko cang lai hih.
