ZZLMS hruaimi ṭangrual Chin ralkap bu hna nih Chinram le Magwe ramri ah a ummi Mit Thar Dam i SAC ralhrang sakhaan cu nihin December 22 ah tlamtling tein an lak khawh, tiah thawngpang kan theih.
ZZLMS tiah theihmi CDF-Zophei, CDF-Zotung, CDF-Lautu, CDF-Mara le CDF-Senthang hruainak in CDF-Mindat, CDF-KKG le PDF hna nih Mit Thar Dam an lak hi a si.
Mit Thar Dam hi Hakha peng, Senthang hmunram le Gangaw peng ramri ah a ummi a si, a umnak taktak cu Gangaw peng chung ah a si. Hi Mit Thar Dam hi Electric peknak ah an hmanmi Dam a si caah abiapi ngaignaimi a si.
Sakhaan lak tukdohnak lio ah SAC ralhrang nih vanlawng in mipi ralkap a rak kah hna caah mipi ralkap in aa hliammi cheukhat an um pin ah CDF-Mindat in ralkap pakhat nih a nunnak a pek.
Mit Thar Dam kahdohnak ah hin SAC ralhrang lei a thi zat an langhter rih lo i, sakhaan in a zaammi SAC ralhrang pawl an dawi hna lio a si, tiah thawng kan theih.
