Premier League ah minthang ngai a simi hmaikal Mohammad Salah nih an chungkhar Christmas an hmannak hmanthlak cu online ah a tar tik ah Muslim pawl nih fak ngaiin an soisel len.
An hnulei ah Christmas thingkung a um i, a nupi le a fale pahnih he an thlakmi hmanthlak cu Salah nih Twitter ah a tar i, ‘#MerryChristmas’ tiah ca a tial chih.
Muslim pawl nih Khrihfa nih kan tuahmi Chrsitmas nih zei tik hmanh ah an tuah ballo. An biaknak he aa ralkahmi a si.
Cucaah, Salah cu Muslim a si bang in vawleicung Muslim tampi nih lungfah in le thinhung ngaiin an thangchiat i, an soisel len.
Oscar Romerio timi Muslim pa nih cun “Liverpool fan ka sinak hi a sau tuk cang. Asinain, atu cu nangmah Salah nih Christmas na tuah ve caah Liverpool zong ka hlawt cang lai,” tiah a ti.
Asinain, micheu khat nih cun Salah hi an dirpi ve. Biaknak phung a si ko caah hi bantuk tuah ve i, atulio vawlei cung ah cun a herh vemi a si ko tiah a thatnak lei in a hmut mi tlawmpal zong an um.
Sihmanhsehlaw, Muslim tam deuhpi nih cun Salah hi an soisel tuk hringhran. A nupi le a fale tiang in an hnorsuan hna.
Salah hi Egypt rammi a si. Atu ah kum 30 a si cang. Liverpool ah hmaikal a chuih liomi a si i, atulio vawleicung bawlungchuih hmaikal lak ah a thiam bik pawl ah aa telmi minthang a si ve.
