France le Argentina hi 2022 World Cup final ah an i tong lai tiah Group Stage lio te khan bia a rak phuangtu Brazil prophet Athos Salome nih 2022 World Cup winner ahodah si lai timi zong a hun phuan cang.
Chanthar biaphuanthiam tiin an minthang ngaimi Athos Salome (kum 36) nih atutan World Cup Final ah hin Argentina le France an i tong lai. Argentina nih World Cup Champion hrai an thir lai, tiah biaphuannak a rak tuah bang in atu ah a tling taktak ko. Amak ngaite.
Athos hi ahlan bia a rak phuanmi pawl chung in ahmaanmi an um len caah mi nih an zumh ngaimi a si. Anih hin Brazil rammi (Khrihfa) a si i, US ram i Winston Churchill University ah Parapsychology degree a hmumi a si.
Coronavirus zawtnak nih 2020 ah vawleipi a cul lai tiah a rak phuan bal. COVID-19 cu 2020 a leh hlan December 2019 ah a rak chuak taktak. A nicaan dikthlir in ahman lo nain a biaphuan muru a dik.
Cun, England Queen Elizabeth thihnak kong, Elon Musk nih Twitter a cawk lainak kong, Ukraine ral kong tibantuk zong hi a rak chimphuan chung cang, tiah Daily Star nih a tial.
COVID-19 a can nakding kong hi, “2020 ah vawleitang in thihnak siangpahrang a rak tho lai i, kan vawleipi a cul lai. Sualnak ngei lo minung tampi an nunnak a liam lai,” tiah a rak phuan.
“2023, 2024 le 2026 ko ah hin kanmah minung thatlonak ruang ah vawleicung ah harnak nganpi a tlung lai. Tihphannak cu Van ah khin chummui bang in aa zel lai,” tiah a phuan chapmi zong a um rih.
Atutan ah zei ruang ah dah Argentina nih France an tei lai i, World Cup Champion hrai an thlir lai timi kong ah a tanglei bantuk hin a langhter.
“Atutan Argentina Team i an hmelchunhnak hi number 8 a si. France hi number 7 a si. Number 7 hmelchunhnak hi a thawng ngaingai ko nain number 8 a simi Argentina hi a chei deuh lo,” tiah a ti.
“Number 8 nih a langhtermi cu chan pakhat aa thawknak le a dihnak ti a si. Atu ah Messi hi World Cup ah a chuih a donghnak a si i, Julian Alvarez hi a chan aa thawknak a si. Cu nih cun dohdonghnak le hramthawknak timi a langhter i, a tlamtling ngaingaimi a si,” tiah a ti chap hoi.
Prophet Athos nih hin Math (Tinchia) ningcang bak in a tuakmi a si. Zei ruang dah France an sungh lai timi kong ah hitihin a chim nolh ko cu ta.
“Number 7 hi Seven of the Law timi ningcang he zoh tik ah thazang a thawng ngaimi number a si ve ko. Asinain, amah le amah a khilhkhalhnak ah rawhralnak lam ah a phan khomi a si,” tiah a chim ko cu ta, duale hna.
A phuan bang in Argentina nih France cu an tei hna i, World Cup Champion ah an i chuah taktak cang ko.
