Myanmar ram kahdohnak vialte a daih i ram pumpi ah daihnak a len khawh nakhnga Min Aung Hlaing le a nupi nih Ayeyawaddy ramṭhen ah raithawinak an tuah, tiah theih a si.
Min Aung Hliang le a nupi cu January 20 ah khan Ayeyawaddy ramṭhen, Pathein khua i SAC ralkap sakhaan ah an kal i atu bantuk in raithawinak an tuah hi a si.
Raithawinak an tuah lio ah zawng pathum kha hnu-hmai an lehter thluahmah hna i cu lio ah cun phungki pawl nih thlacamnak an ngei.
Cu dih cun daihnak hmelchunh va a si mi ṭhuro 14 kha an rak put i Min Aung Hlaing le a nupi nih an thlah hna.
Hi thil sining a theitu upa pawl nih an chimmi cu “Zawng pathum thengmang an hman hnawhchannak aruang cu tlangcung hriamtlai bu thum (AA, MNDAA, TNLA-Northern Allience) hi an i tinhmi a si. Cun, ṭhuro 14 thengmang an hmanmi cu Myanmar ramchung ramṭhen le ramkulh 14 ah daihnak a len nakhnga tiin an tuahmi a si ko,” tiah an chim.
Myanmar ram tuanbia ah rialdip uk Nay Win thawk in Tann Shwe le atu Min Aung Hlang tiang hin kutlam zoh (Bedin), mang leh le biaphuan tibantuk hi an zum ngaingai rih.
