Nihin Portugal le Switzerland puai ah Ronaldo cu First Lineups ah an telh ti lo i, amah hmunhma ah Goncalo Ramos (kum 21) timi Number 5 pate an chuihter. An i huh taktak!
Minute 17 a si ah Goncalo Ramos nih dawh tuk in Switzerland cu a kawl hna. Minute 51 le 67 ah goal 2 a thuat chap. Atutan World Cup ah a pakhatnak bik Hat Trick a suttu a si.
Atutan Switzerland he puai ah Portugal coach Fernando Santos nih Ronaldo cu ayan bakbak ah a chiah ko.
South Korea he puai hlah ah Ronaldo nih Training a tlolh pin ah amah ruang ah ti awk in South Korea nih 2-1 in an rak tei hna. Cucaahcun, Santos nih Ronaldo hi thinhung in ayan thudan ah a thuter hrimmi a si lai tiah an zumh.
Aralaimi puai zong ah Ronaldo hi First Lineups ah i tel dawh a si ti lo. Aruang cu amah hmunhma ah an chuihtermi Ramos hi a tha tuk hringhran.
Cucu Ronaldo zong nih a el kho lai lo. Switzerland goal ah a voi 2 nak goal a sut khan Ronaldo zong ayan thudan in a tho i, a lawmh len.
Khatlei kam ah ngaihchia ngai a simi cu vawleicung minthang bawlung chuih thiam pakhat a simi Ronaldo caah atutan hi a donghnak an ram caah bawlung a chuih a si kho cang.
Cucaah, amah upatnak hrimhrim zong ah a thilti khawhnak langhter awk ah an coach (nipyah) nih hin hmunhma pe deuh ko sehlaw ka duhpiak.
Nihin puai ah Ronaldo cu minute 75 hnu ah an luhter. Portugal nih Switzerland cu 6-1 bak in an tei hna i, Quarterfinals ah an kai. Quarterfinals ah Morocco he an i cel te lai.
