World Cup Quarterfinals ah Morocco nih minthang Portugal cu 1-0 in a tei i, Ronaldo te Team Portugal cu puantom zual in in ah an tlung cang ko lai.
First Lineup ah Ronaldo an chiah lo ruang ah mi tampi an lung a tling hrimhrim lo. Atutan hi Ronaldo caah a donghnak bik World Cup a chuih zong a si caah hmunhma pek deuh awk a si a titu zong an um.
Fox Sports ah bawlungchuih lei a tial tawntu Journalist pa nih cun, “Morocco puai ah hin Ronaldo hi First Lineup ah an chiah cang lai tiah ka zumh. Aruang cu Morocco defense (Back) mual ngei tein a pah khotu ding cu Ronaldo hi a si,” tiah puai an thawk hlan khan a rak chim.
Asinain, Switzerland puai ah kawl 3 a sutmi Ramos tu First Lineup an chiah than i, Ronaldo cu Half Time hnu minute 51 ah an luhter.
Twitter ah pa pakhat nih, “Mah tluk Ronaldo nih a thilti khawhnak kum tampi a kan hmuhsak cangmi kan theih ko nain nizan nai Switzerland puai khatte ah a thilti khawhnak a kan hmuhsaktu Ramos tu hmunhma an pekmi cu Ronaldo caah lungfak tuk a si. A fair hrimhrim lo,” tiah a ti.
Atutan Morocco he puai ah hin Ronaldo hi tuan deuh an luhter hna sehlaw thil sining phundang in a kal hrimhrim lai tiah an zumh cio.
Ahlan Portugal minthang hmaikal Luis Figo nih, “Ayan ah Ronaldo nan chiah bu cun zeitindah World Cup ah teinak cu nan hmuh khawh hnga. Amah loin Switzerland nan tei, a tha ngaingaimi result a si ko. Asinain, Ronaldo loin nan tei kho peng hna lai maw? Nemmam! Ronaldo nan chiahtami hi a palh. Atutan sunghnak hi tlangtlatu lei palhnak ruang ah a si ko,” tiah a Twitter cahmai ah a tial.
