November 29 ah an chuihmi Portugal le Uruguay puai ah Portugal nih a voi khatnak an kawlmi goal cu Ronaldo nih amah sutmi bak ah a ruah nain bawlung a serchuahtu Adidas le World Cup a tawlreltu FIFA nih Ronaldo kawlmi a si lo, tiah ESPN sin ah an fehter.
Half Time hnu minute 54 ah Portugal laikal Bruno Fernandes nih kawl lei ah a chuihmi cu Ronaldo nih lusuk ding in a zuan hnawh i kawl chung ah a lut.
Ronaldo nih amah kawlmi ah a ruah caah aukhuan buin cerhtual rii ah a vung tli i a au len.
Asinain, Fernandes kawlmi a si tiah second tlawmpal a rauh ah an thanh. Ahopaoh an lau cio. Ronaldo kawlmi ah an ruah cio.
Asinain, Adidas le FIFA nih chanthar (IT) fimthiamnak in Ronaldo nih bawlung a tongh le thongh lo tha tein an zoh tik ah Ronaldo lu nih hin bawlung hi a tawng ngaingai lo tiah ESPN ah an chim.
CNN sin zong ah Adidas nih hitihin a chim: “Tha tein zohfelnak kan tuah than hnu ah Ronaldo nih hin a lu in bawlung hi a tawng ngaingai lo” tiah an chim.
Kawl a suttu Fernandes a ruah ning an hal ve i, “Ronaldo nih a kawlmi bak ah ka ruah. Kha bawlung kha Ronaldo ka chanhmi a si. A zei a si khom ah teinak kan hmu i hmai kan nor khawh hi abiapi bik ko,” tiah CNN sin ah a chim ve.
