Kalay-Hakha lampi cung i Taingen SAC ralhrang sakhaan cu nihin January 16 zinglei ah CNA hruaimi kan miphun ralkap nih an lak i, SAC ralhrang ruak 29 an char.
“Sakhaan cu nihin zing ah kan lak dih cang. SAC ralhrang ruak 29 kan char. Kanmah lei zong in minung 8 nih nunnak an pek i minung 60 hrawng kan i hliam,” tiah CDF CDM-Siyin ttuanvo ngeitu nih a chim.
“Taingen SAC ralkap sakhaan a kan laakter khotu kan Pathian min lianngan chin ko seh,” tiah CDF CDM-Siyin nih an Facebook cahmai zong ah an langhter.
SAC ralhrang ruak an charmi leng ah a nung in a zaammi SAC ralhrang tlawmpal an um an ti i, a zaammi ralhrang pawl tlaih khawh ding in an i zuam lio a si.
Taingen SAC ralkap sakhaan cu January 12 thawk khan CNA, CDF CDM-Siyin, CDF-KKG, PDA, TCDF, CDF-Zaniatram, CDF-Hualngoram, CDF -Thantlang le CDF-Hakha hna nih an doh i, a ni nganak nihin zinglei ah tlamtling tein an laak khawh hi a si.
Taingen khua laak abiapit tuknak cu Kalay-Hakha lampi cung ah a ummi a si pin ah Kalay in India lei chawlehthalnak lampi cung ah a ummi a si caah a si.
Atu CNA hruaimi kan Chin miphun ralkap nih Taingen an vun laak khawh tik ah Kalay in Hakha le Kalay in India ramri Rihkhawhdar lei kalnak caah a him ngai cang lai.
