Taingen SAC ralhrang sakhaan cu kan ralkap hna nih nunnak pek in ni 4 chung an doh hnu ah an lak khawh cang, tiah thawngtha taktak kan theih.
CNA bawino Salai Thangloon nih, “Pathian thawng in Taingen SAC Camp cu kan lak cang. Atu hi kan kir lei si cang. Pathian thawng in a si,” tiah mirangca in a ttial i an kir lio hmanthlak (a cung hmanthlak) he a tar chih.
CDF CDM Siyin ttuanvo ngeitu pakhat zong nih, “Nihin January 16 zinglei ah kan lak khawh cang. Asinain, Kalay lei in miakpi in ralhrang nih a kan kah peng rih ko,” tiah a chim.
January 12 thawk khan kan miphun ralkap nih Taingen ralhrang sakhaan doh hram an thawk i, SAC ralhrang nih Kalay University in miakpi in kah a bawmh hna pin ah vanlawng zong in nitin in a rak bawmh hna.
Taingen ralhrang sakhaan laknak ah hin kan miphun ralkap lei in minung 8 nih ram le miphun caah an nunnak an pek.
Taingen khua SAC ralhrang sakhaan a latu kan ralkap hna cu CNA, CDF CDM-Siyin, CDF-KKG, CDF -Thantlang, CDF-Hakha, PDA le CDF-Hualngoram hna hi an si.
