Atutan Qatar ram ah an tuahmi 2022 World Cup hi kan chan ah bawlungchuih lei ah a lar bikmi Leo Messi le Christiano Ronaldo i an chan a dihdonghnak a hun si ve cang.
Hi hnu ah anmah club ah caan zeimawzat cu a chuih ko lai nain ram aiawh bawlung puai (International Match) pawl ah an mui kan hmu kho ti hna lai lo.
Ronaldo cu kum 37 a si cang i, 2026 World Cup ah cun kum 40 leng a si cang lai caah ram aiawh in a chuih kho ti lai lo. Messi zong atutan hi a caah a donghnak bik ram aiawh a chuih a si ve ko cang.
Messi cu kum 35 a si cang i, 2026 World Cup ah cun kum 40 chung ah a lut cang lai. Amah pumpak zong nih atutan hi an ram caah a donghnak bik bawlung ah kaa tel a si, tiah a zumh ve.
Aluancia kum 15 thawk in vawleicung bawlung zatlang a uktu Missi le Ronaldo nih kan vawleipi a tlam an tlinter khun–thinturnak, diriamhnak, lungfahnak, nuamhnak, tahnak le nihkhehnak in a khatmi bawlung zatlangpi a kan serpiak khawh.
Cucaah, kei nih cun Messi le Ronaldo karlak ah hin ahodah a thiam deuh tinak in “Hi hna pahnih nih vawleicung bawlung zatlang ah a kan phorhmi le a kan roh tami tuanbia” pawl tu hi ka sunlawih deuh.
The New York Times telh in vawleicung minthang media tampi nih “Atutan World Cup hi vawleicung bawlung chumtual ah Messi le Ronaldo chan a dihdonghnak a si cang,” tiah an cohlan cio.
Messi le Ronaldo lawng si loin vawleicung bawlungchuih minthang tampi zong atu kum World Cup hnu cun aa din dingmi an tam cang. Aa din dingmi hna a tanglei min hna hi hei rel ve hna:
Luka Modric, Thiago Silva, Karim Benzema, Gareth Bale, Sergio Busquets, Andres Guardado, Keylor Navas, Robet Lewandowski, Manuel Neuer, Thomas Mueller, Jordi Alba, Angel Di Maria, Edinson Cavani, Luis Suarez, Eden Hazard, tibantuk pawl zong hi atutan World Cup hnu cun vawleicung bawlung zatlang ah an mui kan hmuh a har cang lai.
