Yangon ramthen, Thanhlin khua ah a ummi phungki sianginn “Thukhida Yama” timi ah a ummi kum 5 in kum 14 karlak nu phungki ngakchia tete cu rawl ei loin an chiah pin hna ah fak tuk in an hrem hna.
An lak ah kum 9 nute cu coka innka khar a philh ruang ah a tanpor ah vual cikcek in tuk a tong.
Kum 14 nute zong ni 2 chung rawl ei loin an chiah i hri in an thlai. A dang kum 5 ngakchia tiang in hrem le rawl loin chiah an tong hna.
An lak ah kum 7 ngakchia nute hi cu a der tthawm tuk cang caah zualhma in a um.
Hi ngakchia 5 hi Shan ramkulh, Mansat khuami an si i, phungki pakhat nih Yangon phungki inn ah nan um lai i ca tha tein nan cawng lai tiah a lem hna caah Thukida Yama phungki sianginn ah a lutmi an si.
A hmutu pakhat nih a chim ning ah cun atu le atu an tukvelh hna. Phungki sianginn saknak ah rianhrang an tuanter hna. Tlakrawh tiang in an phorhter hna i an phorh khawh lo cun tlakrawh in an rialchih tawn hna, tiah a chim.
Nulepa nih an sining an theih tik ah Kyaukmeh kuat than ding in an hal hna i an kuat hna. An kuat hna zong ah an inn tiang an thlah hna lo. An inn phak hlan ah motor in an chiah hna i an kaltak hna.
Hi ngakchia pawl tuksum in hrem kong ah tuanvo a ngei tu bik cu Daw Eh Eain Dara Thirih timi phungki nu a si, taih an langhter.
